Me një vendim të Këshillit të Ministrave të miratuar sot, qeveria “Rama” vendosi ekzekutimin e vendimit të Gjykatës Evropiane për të Drejtat e Njeriut, datë 10.3.2015, për çështjen “Siliqi dhe të tjerë kundër Shqipërisë” (aplikimet nr.37295/05 dhe nr.42228/05), në shumën 1 498 400 (një milion e katërqind e nëntëdhjetë e tetë mijë e katërqind) euro, plus çdo taksë që mund të jetë e aplikueshme.
Pagimi i shumës do të bëhet në favor të aplikantëve, znj. Drita Siliqi (Shundi), znj. Mariana Shundi, z. Andrea Shundi dhe znj. Gjenovefa Mihali (Shundi) nga Ministria e Financave pas paraqitjes së dokumentacionit ligjor të nevojshëm për kryerjen e pagesave nga buxheti i shtetit, brenda afatit 3-mujor nga dita kur venimi i gjykatës është bërë përfundimtar.
Në rast mospagimi brenda afatit tremujor të përmendur në pikën 4, të këtij vendimi, mbi shumat e sipërpërmendura paguhen interesa të thjeshtë, të barabartë me kursin marzhinal të huasë së Bankës Qendrore Evropiane, gjatë periudhës së mospagimit, plus tre për qind.
