Çdo familje kryeqytetase faturën e ujit tashmë, do ta paguajë më shtrenjtë.
Kjo për faktin se çmimit për konsumin e ujit, do t’i bashkangjiten edhe tre taksa të tjera.
Tarifa e pastrimit, ajo e pronës dhe taksa për infrastrukturën e arsimit, do të paguhen të përpjesëtuara sipas muajve.
Rreth 12 mijë leke të rinj shkojnë taksat vjetore për kryeqytetasit, ose thënë ndryshe 1 mije lekë të rinj çdo muaj krahas pagesës së ujit.
Drejtori i Tatim-Taksave në Bashkinë e Tiranës, Arli Naska, sqaron me detaje detyrimet vendore.
Sipas drejtuesve të Bashkisë, taksa për infrastrukturën arsimore do të shkojë për ndërtimin e shkollave në Tiranë.
Kjo tarifë është parashikuar të mblidhet për një afat 7-vjeçar. Ndërkohe kjo taksë për biznesin do të jetë shumë më e lartë, 4 mijë deri 37 mijë lekë të rinj në varësi të xhiros.
Por specialistet e tatim-taksave deklarojnë se për biznesin, kjo nuk është tarifë e re.
Taksa e gjelbërimit është emërtuar taksë për infrastrukturën e arsimit.
Drejtori Naska ka sqaruar edhe tarifat e reja për çdo metër katror të ndarë sipas zonave, që lokalet apo bizneset, shfrytëzojnë hapësirën publike.
Me miratimin e tarifave të reja, Bashkia ka vendosur që çdo trotuar të jetë i lirë deri në dy metër për kalimtarët.
Hapësira që mbetet mund te shfrytëzohet nga lokalet.
Ndërkohë mbetet ende ne diskutim tarifa e shumëkontestuar prej 2500 lekësh në muaj për çdo tavoline lokali, e vendosur në rrugë apo hapësirë publike.
Pas protestave të tregtareve, Bashkia pritet të dalë me një vendim ditën e mërkurë./VizionPlus