Këshilli i Ministrave ka përcaktuar rregullat si do bëhet hipotekimi i ndërtimeve pa leje dhe shtesave të pallateve nga ALUIZNI, në Zyrat e Regjistrimit të pasurive, si dhe kushtet e afatet që duhet të përmbushin subjektet për të marrë tapitë.
Përmes një Vendimi, Qeveria ka përcaktuar si do veprohet në rastet e mbivendosjes së tokës, kur ndërtimi zotërohet nga shumë pronarë, si dhe në rastet e personave që kanë detyrime të papaguara energjie, shkruan gazeta “Shqiptarja.com”.
“Leja e legalizimit regjistrohet në përputhje me dispozitat e Kodit të Familjes mbi regjimet pasurore martesore. Për këtë qëllim, personat e interesuar, që përfitojnë lejen e legalizimit, dorëzojnë pranë ALUIZNI-t dokumentin që provon regjimin e veçantë martesor, i cili përcillet pranë ZVRPP-së.
Në të kundërt, regjistrimi kryhet sipas regjimit të bashkësisë ligjore. Kur leja e legalizimit është nxjerrë në favor të më shumë se një personi (fizik/juridik), për regjistrimin e saj zbatohen përcaktimet e pikës 2, të nenit 30, të ligjit nr.9482/2006, ‘Për legalizimin, urbanizmin dhe integrimin e ndërtimeve pa leje’”,- thekson Vendimi i Këshillit të Ministrave, i miratuar të martën.
