Gazetari Sokol Balla thotë se një deputet socialist i ka dërguar një email në mënyrë anonime, duke i treguar se sa rëndë është ekonomia shqiptare.
“Ndërsa përgatisja emisionin për sonte (në Top Story do jenë të ftuar si rrallëherë, ministri i Financave Shkëlqim Cani dhe ai i Ekonomisë Arben Ahmetaj), një deputet i maxhorancës më shkruajti një email. Duke më kërkuar anonimitetin, ai më kërkoi të merrja në konsideratë shifrat e mëposhtme, që sipas tij, qeveria nuk do t’i pohonte kurrë: mund të pohoj ama, që ky deputet NUK është Ben Blushi!”, shkruan Balla tek Java.
“Ekonomia shqiptare po vuan nga një rritje ekonomike anemike dhe nën potencial (2,5% ne 3 mujorin e dyte). Ndërkohë papunësia qëndron në nivele ende të larta (shifra zyrtare 17,4%).
Konsumi ka një rënie prej 3,1% vetëm në 3 mujorin e dytë, ndërsa ekportet kanë një rënie prej rreth 4% për 9 mujorin e këtij viti.
Gjithashtu edhe importet në periudhën janar-shtator kanë rënë me rreth 1,5%, ku vetëm në shtator ka një rënie prej 7%, gjë që konfirmon frenimin e kërkesës së brendshme për konsum dhe investime.
Të ardhurat buxhetore janë të paktën 55 milion euro më pak se sa plani i rishikuar në mes të vitit aktual. Paraja në qarkullim sipas BSH është tkurrur si dhe stoku i kredisë është me rënie, krahasuar me të njëjtën periudhë të 2014”.
Balla thekson se: “Kjo është vetëm një pjesë e shqetësimeve, që edhe deputetë të maxhorancës, përtej axhendës “Cipras” të Blushit, tashmë kanë filluar të ndjejnë dhe shprehin, haptaz apo gjysëm haptaz. Pse? Sepse tashmë zgjedhjet nuk janë më larg”.