Një studim i Bankës Botërore tregon se kjo situatë mund të ndryshojë vetëm nëse do të ketë një rritje ekonomike më të lartë për rajonin, i cili duhet të kalojë 5%
Vendeve të Ballkanit, përfshirë edhe Shqipërinë, do iu duhen rreth 6 dekada që të arrijnë nivelin e të ardhurave që kanë vendet e Bashkimit Europian. Ky është vlerësimi i një studimi të Bankës Botërore, sipas të cilit tashmë është nevojshme që vendet e Ballkanit të bashkëpunojnë për të rritur nivelin ekonomik. Banka Botërore do të investojë 150 milionë dollarë për të përmirësuar pikat e kalimit kufitar në Ballkanin Perëndimor.
Vendet e Ballkanit Perëndimor përfshirë edhe Shqipërinë do të duan edhe gjashtë dekada të tjera që niveli i të ardhurave të kapë nivelin e BE-së. Një studim i Bankës Botërore tregon se kjo situatë mund të ndryshojë vetëm nëse do të ketë një rritje ekonomike më të lartë për rajonin, i cili duhet të kalojë 5%. Kristalina Georgieva, drejtore e Përgjithshme Ekzekutive e Bankës Botërore tha se një rritje më e lartë ekonomike do të kërkonte integrim rajonal më të gjerë dhe përmirësim të klimës së biznesit për të nxitur investime në sektorin privat dhe rritjen e punësimit.
“Është e rëndësishme që liderët e Ballkanit Perëndimor të punojnë së bashku për të përshpejtuar bashkëpunimin ekonomik mes tyre në transport, tregti dhe korridoret ndërlidhëse me synim rritjen e biznesit”, -tha Georgieva. “Ne jemi të angazhuar për mbështetjen e secilit vend në arritjen e objektivave të tyre – sikurse edhe lidhjen më gjerë të rajonit me tregun e BE-së dhe atë global”, -tha ajo.
Për të ndihmuar në përmirësimin ekonomik të vendeve të Ballkanit Perëndimor, Banka Botërore do të investojë 150 milionë dollarë për infrastrukturën dhe tregtinë.
Projekti për lehtësimin e tregtisë dhe transportit synon përmirësimin e pikave të kalimit kufitar, efikasitetit të shërbimeve të logjistikës dhe futjen e teknologjisë inteligjente në transportin e mallrave dhe pasagjerëve, duke përshpejtuar proceset në pikat doganore.
“Qytetarët e vendeve të Ballkanit Perëndimor do të përfitojnë nga një kosto më e ulët e transportit dhe zgjerimi i tregtisë si rezultat i projektit prej 150 milionë $ të lehtësimit të tregtisë dhe transportit”, shtoi Kristalina Georgieva.
Mbështetja e Bankës Botërore për Ballkanin u bë e ditur gjatë një konference të nivelit të lartë, ku merrnin pjese kryeministri i Shqipërisë Edi Rama, presidenti i Kosovës Hashim Thaçi, kryeministri i Maqedonisë Zoran Zaev, kryeministrja e Serbisë, si dhe presidenti i Malit të Zi.
Për këtë vit, Banka Botërore parashikon një rritje ekonomike rajonale prej 2.6% dhe 3.6% për 2019.
Banka Botërore po investon aktualisht për përmirësimin e korridoreve të transportit në të gjithë rajonin e Ballkanit.
Ajo po punon për të mbyllur disa boshllëqe në Korridorin 8 në Maqedoni dhe Korridorin 10 në Serbi.