Kryeministri Edi Rama iu përgjigj në mbledhjen e grupit parlamentar të PS kritikave për gjendjen e ekonomisë.
“Në fund të vitit 2013 shmangëm kolapsin financiar. Kemi hyrë në vitin e parë kur borxhi publik ka nisur të ulet. Ulja e borxhit publik nuk i është faturuar qytetarëve. 97 përqind e qytetarëve paguajnë më pak taksa,” tha Rama.
Sa i përket punësimit, Rama tha se kjo është një sfidë
për rajonin dhe mbarë Europën.
“Kemi rritur numrin e të punësuarve të siguruar,” shtoi Rama.
Kryeministri e ka përsëritur edhe më parë se qeveria e PS shmangu një kolaps financiar të trashëguar nga qeveria Berisha.
Madje Rama ka vlerësuar ish-ministrin e Financave, Shkëlqim Cani për këtë arritje.
Megjithatë Cani thuajse po zhduket nga skena politike.
Ai u shmang nga Rama edhe në zgjedhjet për kryesinë e PS.
Në vend të Canit ka mbërritur Ahmetaj, për të cilin karikaturisti Bujar Kapexhiu mendon se është sinonim me krizën.
